حب: جماعت اسلامی کے امیر سید منور حسن نے کہا ہے کہ سیلاب زدگان کے لئے امریکا اور بھارت سے امداد لینا زہر کھانے کے برابر ہے۔ حب میں الخدمت کی جانب سے لگائے گئے متاثرین ریلیف کیمپ کے دورے کے موقع پر بات چیت کرتے ہوئے منور حسن نے کہا کہ مصیبت میں گھرے متاثرہ بھائیوں کی مدد قومی فریضہ ہے۔ حکومت ذمہ داری ادا کرنے میں ناکام رہی ہے۔ امدادی کارروائیاں برائے نام ہیں۔ امریکا اور بھارت ظالم اور دہشت گرد ہیں۔
ان کی دی ہوئی امداد میں برکت نہیں ہوتی بلکہ اس سے بیماریاں جنم لیتی ہیں۔ امیر جماعت نے اپیل کی کہ مخیر حضرات اور عوام آگے بڑھ کر سیلاب متاثرین کی دل کھول کر مدد کریں۔ انھوں نے ڈھائی سو متاثرین میں امدادی سامان بھی تقسیم کیا۔
