کوئٹہ: سندھ کے ضلع جیکب آباد سے کوئٹہ آنے والی سیلاب سے متاثر خاتون کے ہاں جڑواں بچوں کی پیدائش ہوئی ہے۔ کوئٹہ میں ایف سی کے ریلیف کیمپ میں موجود سیچاں بی بی کا شوہر جیکب آباد کی تحصیل ٹْھل میں مزدوری کرتا ہے۔
سیلاب میں سیچاں بی بی کے خاندان کے چار بچے بہہ گئے تھے جس کے بعد آج سیچاں بی بی کے ہاں جڑواں بیٹوں کی آمد نے ہر طرف خوشیاں بکھیر دیں۔ بچوں کے نام خالد اور نادر رکھے گئے ہیں۔ ایف سی اسپتال کے ڈاکٹر نے آج نیوز کو بتایا کہ ماں اور بچے صحت مند ہیں۔ سیچاں بی بی کا کہنا ہے کہ سیلاب کی تباہی کے بعد اللہ تعالیٰ نے ان کو عظیم نعمت سے نوازا ہے۔
