سیالکوٹ : سیالکوٹ پولیس نے دو سگے بھائیوں کی ہلاکت میں نامزد ملزم کانسٹیبل کو گرفتار کرلیا،پکڑے گئے تمام ملزموں کو آج عدالت میں پیش کیا جائے گا۔سانحہ سیالکوٹ میں نامزد پولیس کانسٹیبل رضوان وقوعہ کے بعد بارہ روز سے غائب تھا پولیس نے اطلاع ملنے پر ایک گھر پر چھاپہ مار کر اسے گرفتار کر لیا ہے۔منیب اور مغیث کو تشدد کا نشانہ بنائے جانے کے موقعے پر کانسیٹبل رضوان دیگر اہلکاروں کے ساتھ وہاں موجود تھا۔تفتیشی افیسر کے مطابق تمام شواہد اکٹھے کرلیے گئے ہیں جبکہ دیگر ملزمان کی گرفتاری کیلئے پولیس کے چھاپوں کا سلسلہ جاری ہے۔
پولیس نے اب تک نامزد سترہ میں سے بیشتر ملزموں کو گرفتار کر لیا ہے جبکہ واردات کے وقت موجود تماشائیوں سمیت تیس کے قریب افراد کو تفتیش کیلئے حراست میں لیا گیا ہے ۔گرفتار افراد کو پولیس ہفتے کے روز گوجرانوالہ کی خصوصی عدالت میں پیش کرے گی۔گرفتاریوں کے پیش نظر بٹر گاوٴں کے متعدد افراد گھروں کو تالے لگا کر غائب ہو چکے ہیں جبکہ چند ایک گھروں میں صرف خواتین اور معمر افراد موجود ہیں۔
