کراچی میں متعین امریکی قونصل جنرل ویلیم جے مارٹن نے کہا ہے کہ امریکہ عنقریب کوئٹہ میں اپنا قونصل خانہ قائم کرے گا جس سے نہ صرف بلوچستان کی عوام بلکہ حکومت کے ساتھ روابط کو فروغ ملے گا۔قونصل خانے کی وجہ سے امریکہ صوبے میں جاری فلاحی و ترقیاتی منصوبوں کی بہترنگرانی کرسکے گا۔
قونصل جنرل نے یہ بات پیر کو کوئٹہ کے ایک مقامی ہوٹل میں امریکہ کی234ویں یوم آزادی کے موقع پر منعقدہ تقریب سے خطاب کرتے ہوئے کہی۔
تقریب صوبائی وزراء، سیکریٹریز، صوبے کی سیاسی و سماجی تنظیموں، میڈیا کے نمائندوں اور خواتین کی بڑی تعداد نے شرکت کی۔
امریکی قونصل جنرل ویلیم جے مارٹن نے کہا کہ انھیں فخر ہے کہ ہم تعلیم، صحت اور توانائی کے شعبوں میں اپنے دوست ملک کے ساتھ تعاون کر رہے ہیں۔
’امریکہ بلوچستان میں پانی کے مسئلے کے حل کے لیے پانی ذخیرہ کرنے کے منصوبوں میں صوبائی حکومت کے ساتھ تعاون کرے گا، اس کے علاوہ اس وقت صوبے میں امریکہ کے تعاون سے آب پاشی کے مختلف منصوبوں پر کام جاری ہے جبکہ توانائی کے بحران کے خاتمے کے لیے بھی کوششیں جاری ہیں اس سلسلے میں کوئٹہ الیکٹرک سپلائی کمپنی کی مدد کر رہے ہیں تاکہ عام لوگوں کی مشکلات میں کمی آئے۔‘
